اشكي لمين!

اشكي لمين!

كتبها: زاهد عزت حرش

قال المتنبي:

"لا تشكو للناس جرحًا أنتَ صاحبهُ

لا يؤلم الجرح إلا من به ألمُ"

وأقول:

بَشّكي لحالي جُرح كاويني

بأوجاع صارَت، أكبَر من سنيّني

من شان شو يا عُمر عم بتزيد

وبتغّل بعروقي وشراييني

صَايّر أنا مَذبوح بالتقسيط 

ما أصعبا تنغرس بالظهر سكيني

من ما خلقت فيّ الوجع معجون

ساكن بساعات العمر

لا يوم نساني ولا كان ناسيّني

كُل شي بِعلّم الطِب عَجّزّته

وما في حَدا بالطِب يشفيني

عاجز ومَشلول، قُلنا منيح

شُغل وشَقى وهموم تِكويّني

وهَم فوق الهّم يا دُنيا

مَع كُل شَمّة حَبَق المُر تسقيني

شّقيت ع دَرب العُمر، يا عُمر

شوّك وشَظايا شَقت طَرابيّني

لا خُنت مَرّه وَعد

ولا نَكثت مَرّه عَهد؟؟

ع شو يا عُمري عَم تجازيني

يا عُمر مشّرِف على الستين

لوينتا رح ضل، والوجع سابيني

قلنا بآخر هـ العُمر منعيّش

كم سِني ع الهَدا، تـ العُمر يطويّني

أتاري اللي أولته شَقا

مَحروم يحلَم يوم بالعيد والزينه

وقال ابو الفضل بن الأحنف:

"من ذا يُعيّركَ عينه تبكي بها

أرأيتَ عينًا للبكاء تُعارُ"

وأقول:

شو نَفع البّكي ما دام الوَجَع بيزّيد

وبِصُب فوق النار، يا نار نار تقيّد

كُل ما اشتّد الوَجَع، بَضحك ع أيامي

وبقوله زيّد قَد ما فيك وعيّد

ما كان بكاني الوَجَع، لكن

من النَدَم وحدُه بكيت

شو كان بَدي من العُمر

لو ما الهوى، شَرّع لي باب جديد

الحُب نساني الألم

وع شفافي زَرَع بَسمه

وع حفاف الدرب، رتب لي المَواعيد

وحِلوه ع بَابي تدق

وتزيد يا قلبي، ع الوَجَع تنهّيد

كُل ما بتسّقيني، بتنَعنِش عروقي

بِنسى الوَجَع وبِفرَح بِيوم العيد

قَديش قَضّيّنا بالعِشق سِاعات

اخ لو فيّ قول شو ما بريّد

مَع كُل قِصِة حُب عِشّناها

كتبت اللها شِعر ودَونت القَصيد

ورَح ضَلّ للحِلوّين غَنّي

واحلم يا عمري بِحُب جديد

شفاعمرو آب 2013

شيوعي احمر

شيوعي احمر

زاهد عزت حرش

ما بِقبَل يا ظُروفي تُحكميني

وتِكسري جَناحي إذا كِبرَت سنيني

يَعني بَعد ما انشَلوّا جّريّ

ما بَدي قول يا دُنيا ارحَميني

أنا شَاعر بِفكرّي الحُب غيي

رَسمت الّحُب ع حيطان المدينه

شّوفيّها شَفاعمرو منِيّ عليّ

عَطيتا سنين من عُمري وحَنيني

مين اللي فيها اياديهن سخيي

ورَفعّوا مَجدها رَفعا مَتيني

غَير الشهيّد اللّي انقتل بالبندقيِّ

رصاص المُجرم بيوم السَكيّني

شَفاعمرو بالحَكي دَوله غَنيّه

حَكي مَعسول مَضموّنه ضَغينه

يا تِشرين اللّي جَاي بعنتريّ

كُل خَمس سنين أيَامك مُشيني

خَرَبّت قلوب هـ الناس الوَفّيه

وشَعلت النار ببلادي الأميني

احترق ديني بنار الطائفيه

اللي زَرّعَت بالحقد قَلب المَديني

اشتغلوا بعتمة الليل الخَفيّه

 لـ حَتى يركبوا متن السفينه

شّو هَم البلد لو راحت ضَحيّه

المُهم يكون قَاعد ع الخَزينه

حلمهُ برئاستها، كأنها جمهوريه

وكرسي تكون مرتاحه وحصيني

يا شهر المرحبا يا مسرحيه

كل من فيك حاول يشتريني

نفس الحكي، خطاباتهن غبيه

هرج ومرج، ودراما حزيني

يا جايني باسم الله أكبر

كنيسه وجامع وخلوه رصيني

انا أحمر، شعاري ما تغيير

باسم الدين ما بسوى تحاكيني

أنا مش برتقالي ولا اصفر مشفر

ولا على الاخضر معود يميني

ولا مع الخمسات كنت يوم اسهر

ولا الأزرق على الأبيض غويني

شيوعي، وحزبي من التاريخ أكبر

ارجعوا شوفوا تواريخي وسنيني

بثورة العمال انا اللي كنت أخطر

من السكين على رقاب الرهينه

اكمن باص على المفرق اتكسر

وياما جنود بعثرهن يميني

ويوم الأرض، لما الأسد كشر

أبو الأمين، في الجلسه اللعينه

لو لا وجودي مين كان سطر

ليوم الأرض أمجادوا الثمينه

يا شهر المرحبا وجهك مغبر

انقلع من خلقتي صعب تغريني

مش كل ما اعتلى واحد ع منبر

بيبتدي التاريخ منو يا حزيني

زعيمك ع الجزيره صار يظهر

من أموال النفط عبى الخزينه

"مرادك" لو تعرفي بشو مزنر

مسدسه مربوط ع الجنب اليمينِ

نحنا منعرفوا، والناس أخبر

بكل من قبض بالشكل الروتيني

شو بدنا بالحكي، خلي مستر

لـ حتى يوم تفضحكن حنيني

نسيتوا شو عمل فينا هود خيبر

بطابو من التوراة كذبتهن لعينه

صارلهن دوله مع جيوش وعسكر

وشتتوا بالقهر شعبي الفلسطيني

انتبهوا للعِلّم، شوفوا العِلم طوّر

بلاد اللي كانت مرهونه وحزينه

يا ناس

جبهة شعبنا هي الأقدر

على حمل الأماني وهي أمينه

وهيّ اللي الها مع الناس محور

أساسه كرامة شعبنا عالي الجبينِ

مش كل ما طلع واحد وزعبر

باسم الدين يهدر دم ديني

خلوا صوتكم يوم الوغى يزّأر

هدير يزلزل حدود السَّكيني

امشوا ع الدرب لو كان أخطر

تحدي، لمجرم وعاهر وأزعر

تـ نحفظ بالشرف شرف المدينه

شفاعمرو – تشرين اول 2013