الشتا غرقان
زاهد عزت حرش
عم يسألك كانون يا نيسان
شو غيرك شو بدل اللي كان
وعم يستحي من مية الوديان
تمشي وتهدر، والشتا بركان
الغيم غطى كل فتحات السما
وتوشحت بغيمها النعسان
الشمس غابت خلف غيماتك
وتكسروا الوردات ع الاغصان
شوف الهوى كيف عم يركض
من ساحته وجه الهوى هربان
ع طلتك زَهر الشجر هرهر
وتكوموا الورقات ع الحيطان
نيسان يا نيسان يا غرقان
بالشتا بالرعد شو بردان
شو استحى كانون من صيفه
لمن لقاك بموسمك عريان
كان البحر بغفوته مرتاح
من قبل منك بالغفى غفيان
لا هدر موجه ولا صرخ جوعان
بدو الشتا بدو النهر طوفان
وهلق اتكسر من عجقة الموجات
بالريح جن وضيع العنوان
نيسان انت الورد انت السحر
انت الطبيعة بأجمل الالوان
انت الدفى والحب والاشواق
من شوقتك شو تشوق العشقان
ومن رحمتك عم تحرم العشاق
يتناغشوا وينسلوا الخيطان
ويمرمغوا شفافهن بلحظة حب
يصير الفلى من حبهن سكران
ما كان بدنا هيك انت تكون
ولا يصير كانون بشهر نيسان
نيسان يا حب وحلا يا مرج اخضر يا سهل فتان
يا صوت عصفورين بحبوا
بيقطفوا من جنتك ريحان
فيك التقيت بحلوة الحلوات
ع كتف تله والبحر فرحان
كومات من شفافا قطفت كروم
غبيت غبيت ورجعت جوعان
لو ما التقيت بحلوتي بعهدك
كنت قلت ما اجى نيسان
صرت حبك لو شتا تشتي
لأني من يومها بحبها
ولعيونها ببعث حكي وقصدان
9.04.07
ليست هناك تعليقات:
إرسال تعليق